काठमाडौँ– भेपमार्फत सुनतस्करी गरेको प्रकरणमा थुनामा रहेका माओवादी नेता कृष्ण बहादुर महराले २० लाख धरौटी बुझाएका छन्।उनलाई बिहीबार उच्च अदालत पाटनले जिल्ला अदालत काठमाडौँको आदेश बदर गर्दै २० धरौटीमा छाड्न आदेश दिएको थियो। आदेश दिएसँगै महराले धरौटी बुझाएका हुन्।उनले धरौटी बुझाएसँगै छाड्ने प्रकृया सुरु भएको जिल्ला अदालत काठमाडौँका सूचना अधिकारी दिपक कुमार श्रेष्ठले जानकारी दिए।

भेपमार्फत सुन तस्करी गरेको अभियोगमा मुद्दा दायर भएपछि गत असोज २९ गते जिल्ला अदालत काठमाडौँका न्यायाधीश हर्कबहादुर क्षेत्रीको इजलासले पूर्पक्षका लागि थुनामा पठाउने आदेश दिएको थियो।पूर्वसभामुखसमेत रहेका महरामाथि चिनियाँ नागरिक लि हासोङसँग मिलेर इलेक्ट्रिक चुरोट ‘भेप’मार्फत सुन तस्करी गरेको आरोप छ।

उनलाई प्रहरी असोज २६ गते पक्राउ गरेको थियो। लगत्तै जिल्ला सरकारी वकिल कार्यालय काठमाडौँले महराविरुद्ध पुरक अभियोग दर्ता गरेको थियो। महराविरुद्ध ८ करोड बिगो दाबी गरिएको थियो।उच्च अदालतले महराविरुद्धको अभियोगमा यथेष्ट प्रमाण पेश हुन नसेको र जाहेरीमै नाम उल्लेख नभएकाले पुर्पक्षका लागि थुनामै राखेर मुद्दाको कारबाही अघि बढाउने निर्णय उचित नभएको ठहर गरेको छ।